Wlu Abdiasɩ 'tmʋa a
1
Dɛ Kea -nɩa Tʋbo" 'tmʋʋ a Abdiasɩ 'de Edɔmʋ -blʋa 'a -tɩ' 'ʋn ɛ ka:'Ɩn 'wɔn wlu -ɛ -wlʋ 'de Nyɔsoa o, ɛɛ' wlu tu mu 'e 'blʋa deejrɩ' 'di i 'mɛ -ke, Nyɔsoa 'na: Ao sɔn 'ʋn -a -je Edɔmʋ -blʋa tʋ "bli kpa.
Edɔmʋ 'a 'kao kpɩɩn'
2 Edɔmʋ, -ma muɛ "i pia 'de 'blʋɩ -siae' -wee' "kwlu, -wɛe nyʋ -wee' "klein 'je -ʋn -flɛɛn.
3 Dɛ-nʋɛ', -ma -cɛ" "i bɛa' a siɛ -ʋn 'kwla. -Mɔ -ɔ -tia" 'de 'soa 'a -kwlewɔn 'di ɛ. -Mɔ -ɔɔ -gbu" nɩa 'de crʋɩ "kpei ɛ, -mɔ -ɔɔ wlu ka 'de -ɔɔ -cɛ" 'ʋn, -ɔ -na: Nyɔ -je 'mɔ -sɔn po ɛ-?
4 -Bo -ɩn -nɩ 'de jaʋn 'a 'tee te "i ka -cii" nɩa, 'de -ɩn -je -ma 'jro po 'de 'cɩ -sɩɩn "kwlu mɔ 'de ɛ, 'ma muɛ -ʋn -sɔn poa'. 'Ka 'mɔ Nyɔsoa 'da.
5 -Bo "jri nyʋ ke dɩ doa nyʋ ji 'de -ma 'blʋa 'di "maʋ, 'de -ɩn -je 'tɩɩn -te 'ee? Ʋʋ se dɛ ʋʋa pɔan 'ʋn "duo i? -Bo nyʋ ja -ʋn rɛsɛn' -sa -pan 'de -ma 'finyɛ -kle 'di 'e, ɩa' -kwlan" "mɩ "mɩ ka mɩ ʋʋ 'jee sie ko-?
6 Oo! -Gbʋn ka ʋʋa "jrɛɛ a -ʋn ɛ, Esau, -ma "wlii -pa' 'kwla 'dee -wee' 'pɛɛn "kpae!
7 Nyʋ "klein -ʋʋ -ke -ʋn -dbɛɛa 'dee -wee' nʋɛ -mii' 'sʋ ʋʋ je -ma 'blʋa 'a -paʋn jɛɛ-. Nyʋ -nɩa -ma ba 'de ɛ, ʋʋa -gba -sepeɛ de -ʋn -pee. Tɔ' 'di nɩa' ke pɛe 'a blu 'a se 'de Edɔmʋ nɩ 'bode.
8 'Kɩɩn, 'ka 'mɔ Nyɔsoa 'da, 'de ɛɛ' 'wɩ tu 'di ɛ, 'ma muɛ tɔ' 'di nɩ nyʋ -nɩa 'de Edɔmʋ -blʋa "kpei -wee' 'a ma" i -saa', 'ɩn se 'e due' -gbai' ka 'de Esau 'a crʋ blʋa -nɛ "kpei sie i.
9 -Ma tʋ -fɔʋn, 'oo Tema -kwlɔ, 'blʋa a muɛ miia" "jri 'kpaa, ɛɛ muɛ nʋa' "ku klae" klae" 'a 'mɩa 'je nyʋ -wee' 'de Esau 'a crɩ "jru i -sa 'de Edɔmʋ -nyʋ 'a dɛsaʋn nʋ -tɩ 'ʋn.
10 -Ma 'a -ma dedi' Sakɔbʋ 'a "nynuu -klan" "kpei -tea' 'a -tɩ' 'ʋn, -tɩn' a muɛ -ʋn "i 'dbaa -wɛe -ɩn -je i sɔn 'bode -bode 'bode.
11 'Kaa -ɩn -nɩ 'e 'wɛ -sɔntɩ 'dʋɩ a kpa ɛɛ' "wliiɛ ɛ, -ta 'dʋɩ a paa 'de ɛɛ' "kwi -kwlɔ 'di -wɛe ʋʋa poa soa' a, 'de ʋʋa -sea' Selisalɛmʋ 'a 'bleedɩ 'ʋn 'de ʋʋpʋ 'nynɩ ɛ, kɩɩn, -mɔ -ke ɛ, ka ʋʋ nʋa 'kamɔ -ɩn nʋ -ke.
12 -Mɔ Edɔmʋ -blʋa, -ta -ma dedi' Suida 'a "nynuu nɩɩa 'e 'kle 'di 'de ɛ, -ɩn seɛ 'bɛɛ- -ɩn -je 'e -gbʋn -wɛe -ɩn -je mʋa nʋ 'de ʋʋa' i sɔn -tɩ 'ʋn -wɛe 'de ʋʋa' 'kle 'je -sɔn 'di ɛ, -ɩn -je wɔn 'bai -flabaʋn, ʋʋa' -crei" 'je 'e -mɔ 'wɔn jii-.
13 -Ta nyʋ 'wlaa 'ma 'cɛ 'ɛɛ dɩ "kpei -wɛe ʋʋa 'tɩn ɛ, -ɩn seɛ 'bɛɛ -ɩn -je 'de "kwi -kwlɔ 'di pa -ke 'de-. 'De -ɩn seɛ 'bɛɛ kewlɛ' -ɩn -je kɩɩn po -wɛe -ma dedi' -wi" -nɩa 'de 'kle 'di -ɩn -je ʋʋpʋ 'jraa-. 'De -ɩn seɛ 'bɛɛ foo" 'sʋ -ɩn -je 'e nyʋ -ʋʋ -wla ʋʋa' "wlii "kpei -wɛe -ʋʋa -tɩn, -ɩn -je 'de -mʋ "kwlu 'kpa 'de -ɩn -je ʋʋa' "wlii 'tɛn -ke.
14 -Ɩn -se' 'de -je -gbaɩn' inyna i 'de- -wɛe ʋʋa' nyʋ -ʋʋ -poa 'de tʋ "wɛin, -ɩn -je -mʋ 'dba, 'de -je ʋʋpʋ 'a tʋnyʋ "nyɩ, 'de -mɛ 'kamɔ ʋʋ nɩ 'e 'kle 'di.
15 -Sɔn' -bo -ɛ -sɩn', -wɛe Nyɔsoa 'jea 'blʋa 'a 'pee 'je se o tɛɛn-, 'de ɛɛ' -sɔn' tu 'di mɔ ka -ɩn nʋa nyʋ ɛ, Nyɔsoa 'je -ʋn kan' nʋ -wɛe dɛsaʋn -ɩn nʋa nyʋ "jrii ɛ, 'je 'de -ʋn "jru 'kpa.
16 Dɛ-nʋɛ' ka Israɛ -nyʋ 'na 'ma 'cɛn ɛɛ mɛ 'de 'ma crʋ -kwɛa i "kpei ɛ, 'kamɔ 'blʋa "klein -sia 'e a mu 'ma 'cɛn ɛɛ mɛ 'naa -ke jee jee. Ʋʋa muɛ 'naa, ʋʋ 'je ɛ mla ʋʋ 'je ɛ 'je -wɛe ɛ 'je ʋʋpʋ- nʋ, ka nmɔɔ nʋa nyʋ ɛ, 'de ʋʋ 'je i sɔn -wee' -we -wee'-.
17 'Kaa 'de Siɔn' crʋ "jru -kwea i ɛ, 'bomɔ 'pʋʋa a mu 'wlʋa, -wɛe 'ma -gbu" 'je 'e Sakɔbʋ 'a "nynuu 'kwa 'bɔɔ- 'de ɛ 'je ʋʋpʋ- 'a dɛ nɩ-.
18 Sakɔbʋ 'a "nynuu a muɛ -kɛkɛ nɩa' ka nɛ nɩa, -wɛe ka nɛ mɩɩɔ nɩa Sosɛu 'a -gbu" -sɔn nyʋ 'je kan' nɩ. 'Kaa Esau 'a "nynuu -mʋ ɛ, ka -kaa nɩa 'ka ʋʋ 'je nɩ-. -Bo Sakɔbʋ 'a "nynuu ke Sosɛu 'a "nynuu tba ʋʋpʋ nɛ 'sʋ ʋʋ 'je sin 'pepe ʋʋ 'je ja -kwɛ. Nyɔ -saan"- ka se 'e Esau 'a -gbu" -sɔn siei, dɛ-nʋɛ' wlu Nyɔsoa 'tmʋa -o.
19 Nyʋ nɩa 'de Nekɛfʋ a muɛ Esau 'a 'blʋa kpʋn 'a. Ʋʋa muɛ Filitɛn blʋa 'a wlao foo" 'sʋ "kpei jiia' -ke -wɛe ʋʋ 'je 'e Samadi nyni -mɛ 'de Eflaimʋ 'a 'blʋa -ɛ -nɩa Samadi blʋa kpʋn -ke. Bɛnsamɛ 'ɛɛ "nynuu a muɛ Galadɩ -blʋa kpʋn 'a.
20 Israɛ -nyʋ -wlʋa kʋʋɔnkwla' ka "sooa nɩa, ʋʋpʋ -a mu Selisalɛmʋ -nyʋ ʋʋ kpʋn 'a tʋ kʋʋɔn 'ʋn ɛ, ʋʋpʋ -a mu Kanaa 'a -kwlɔ "klein -bɔa' 'de Serɛpʋta fɔo 'blea ʋʋ 'je mu mamaʋ 'sʋ ʋʋ 'je 'e Nekɛfʋ 'a 'fɔ -bɔa' 'de -sɔɩn nyni.
21 Nyʋ -ʋʋ -jea ʋʋ tʋ "kpei -sa a, ʋʋa muɛ 'de -siɔn' crʋ 'jaa 'de ʋʋ 'je Esau crʋ 'ble -wɛe Nyɔsoa 'je 'beɔ nɩ-.